في غرفة العمليات

قال ايه انا هابقي أم........ أم ماشي هنشوف اول حاجة بشوية حسابات بسيطة من الدكتور عرفت ان بنتي هتتولد يوم عيد جوازي يا سلام هوه يعني من قلة التواريخ والله دي فرصة عشان سي حضرة الستاذ جوزي يطنش علي عيد جوازنا. ده ايه الحظ ده وعرفت اني هاولد قيصري لآ وكمان بدري ياسلام باين البحر هيضحك تاني يا بنات تمام كده طب امتي بقي اهو اي يوم بس بلاش سبعة يناير عشان لو بنتي دخلت مدارس راهبات تلاقي حد يحتفل معاها و حاولنا نختار ميعاد مع الدكتورة وكل تمام وجبت البطيخة الصيفي بس ملقتش مكان في بطني احطها فيه عشان مريم كانت واخده كل المكان. المهم يوم عيد ميلادي نزلت اشتري تورتة عشان احتفل وفي الطريق حصلت كده شوية حوارات ادت الي انه تم حجزي في المستشفي عشان اولد يوم عيد ميلادي البنت دي مضطهداني من اولها ولا ايه يعني. ولا يمكن ربنا بيسبب الاسباب اكمن ابوها دايما ناسي عيد ميلادي اهو كدا بقي ينسي عيد ميلادنا وعشان مبقاش ظالمة سي البيه جوزي هو ان جيت للحق بيفضل من اول الشهر فاكر عيد ميلاد وبياخدوا اجازة وبيرتب فيه ويجي يوميها مش عارفة ايه اللي بيحصل بيفرمت الذاكرة بتاعته وبينسي الموضوع.  هايل احساس جامد موتتتتتت.  المهم اتحجزت في المستشفي وانا مش عاملة حسابي علي ولادة خالص وفي ثانية كانت الدكتورة عندي. واخدوني علي العمليات اتحايلت عليهم يستانو لما شنطة الولادة تيجي مرضيوش طب قلت لهم بقي ان فيه تقارير طبية لازم دكتور التخدير يطلع عليها قبل العملية فدخلوني العمليات وركنوني بالسرير علي جنب وانا نايمة علي جنب سمعت هرج ومرج والممرضات بيجروا ويقولوا غرفة عمليات واحد جاهزة فين ميادة فين ميييييادة امسك في دراع ممرضة معدية واقولها انا ميادة تقوم تقولي هششششششش مش دلوقتي.  ونفس حالة الهرج والمرج ونفس السؤال وكل ما انبه ممرضة ان انا ميادة اللي بيدوروا عليها تقولي هششششش شوية لقيتهم بيقولوا ميادة جت ماشاء الله اخيرا شافوني الحمد لله. وسمعتهم بيقولوا هاتوا الدكتورة هالة.  هالة هالة مين انا الدكتورة بتاعتي امنية مش هالة وبمد ايدي عشان امسك اول ممرضة تعدي من جنبي لقيت تروللي نايمة عليه واحدة زييي بصيت لها وسآلتها اسمك ايه ردت وقالت ميادة!!!!!!!! ٠ يا محاسن الصدف في عمري كله يوم ما اقابل واحدة اسمها مياده تطلع هتولد في الاوضة اللي جنبي رحت سآلاها وانتي بقي هتولدي ايه ردت وقالت آياد تنفست الصعداء وحمدت ربنا مفيش فرصة للخبطة.  جة دكتور التخدير سلم عليا وعرفني بنفسه رديت عليه وقلت له انا مياده وعمري كذا، عندي حساسية من البنسلين، الهيموجلبين ٩،٥ حسب اخر تحليل وده سبب ان ضغطي بيوطي احيانا بيوصل ل٤٠/٨٠ ولو حصل ده اثناء التخدير التقرير الطبي اللي معاك بيقول ان القلب سليم ١٠٠٪ ومش محتاجة صدمات كهربائية متقلقش ابتسم لي الدكتور بعد الملخص بتاعي وسآلني وحضرتك تخصص ايه يا دكتور ؟ رديت بكل ثقة لاندسكيب. نعمممممم قصدي افندم ؟ رديت عليه تاني مهندسة يا دكتور. ساعتها قريت في عينيه كل اللي مقدرش يقوله وقالي طيب انا هابتدي التخدير. قلت له لآ انا عايزة الدكتورة بتاعتي الاول من فضلك في حاجة ملحة. الراجل بلم وطلب الدكتورة بتاعتي اللي جت مبلمة وسآلتني خير قلت لها في غرفة عمليات ١ في حالة الدكتورة هالة اسمها ميادة برضو بس هي هاتجيب آياد.  الدكتورة كانت هتتجنن وقالت لي ماتخافيش بنتك مش هتتبدل وبصت لدكتور التخدير حتة دين بصة وقالت له انت مخدرتهاش ليه خدرها بقي خلينا نخلص ومعرفش حصل ايه غير اني فقت علي آلام شديدة هتجنن وحواليا كل اهلي اللي كانوا جايين يحضروا عيد ميلادي وانا علي نغمة واحدة عايزة مسكن ادوني مورفين اههههههه انا هاموت انا تعبانة وفي وسط كل هذه الآلام وبكاء زوجي و امي عشان صعبانه عليهم  دخلت ممرضة هابلة بتقولي الف مبروك عقبال ماتخاويها عن قريب. تركزت كل الاوجاع اللي كنت حاسة بيها في كلمة واحدة هاتولي بنت التيييييييت دي وبعد المسكن شفت احلي مخلوق في حياتي شفت مريم اللي صممت تتولد يوم عيد ميلادي احبيبتي يامريم

ايام في حياتي: ضل راجل ولا ضل حيطة

ايام في حياتي: ضل راجل ولا ضل حيطة: ياربي علي الانسان طول عمره من حاله تعبان ولا الغني مرتاح ولا الغلبان وياعين علي البت المتجوزة واللي فاكرة نفسها معنسة وهي علي نفسها مغلسة. ...

ضل راجل ولا ضل حيطة

ياربي علي الانسان طول عمره من حاله تعبان ولا الغني مرتاح ولا الغلبان وياعين علي البت المتجوزة واللي فاكرة نفسها معنسة وهي علي نفسها مغلسة. ياسيدي علي السجع هو انا هاعيش في الدور ولا ايه ايه الخيبة دي خلينا في موضوع المتجوزة اللي كل الستات فاكرنها لما بتشتكي لصحباتها اللي مش بتخزي العين وهي والله ولا بتخزي ولا خيبة دي مبقوقئة وحاقدة علي اللي مش يعني مثلا المتجوزة دي دايما بيتقالها ياختي ظل راجل ولا ظل حيطة حيطة يا خبر اسود طب ولما اتجوز ويطلع البيه بتاعي هو الحيطة يبقي ايه بقي ولا ياسلام لو طلع مواكب للعصر ولوح تلج مش حيطة يبقي مين الكسبان ومين الخسران المتجوزة ولا اللي مش. يعني مثلا اللي مش لما بتتعب اهلها بيدادوها والناس بتسآل عليها اما المتجوزة غير لما بتتعب محدش بيعبرها خالص والبيه جوزها بيبصلها بغباوة ويقولها هوه الغدا الساعة كام ولو تعبانة قوي يقولك خديلك قرصين اسبرين وقومي اعمليلي الشاي يا مدام يعني حتي مش سلامتك يا حبيبتي ويرفع سماعة التليفون يكلم امه ويقولها فلانة لأ دي زي الفل يادوبك حرارتها اربعين. ولو الموضوع كبر عن كده واضطر يجبلها الاسعاف والدكتور يقوله ايه ده حرارتها اربعين وضغتها واطي ومحتاجة رعاية يقوم متسحب ومطلع لابوها ويرن لابوها علي الموبايل ويقوله جري ايه ياعمي  هو مش برضك فلانة معاها ضمان عشر سنين طب ايه ده بيقولوا عليها تعبانة ومحتاجة عناية بص انا هابعتهالك التوكيل عشان الصيانة يوه لخبطوني انا قصدي هابعتهالك علي البيت عشان تخدوا بالكم منها لغاية متكون كويسة اصل انا مشغول قوي وطبعا الاب عشان خايف علي بنته بيبقي هاين عليه يروح يجبها بنفسه. وبعد يوم اسبوع شهر زي ماتيجي تسترد المتجوزة صحتها يجي البيه يستلمها تروح البيت تلاقي تل المواعين تل الزبالة ده غير اعقاب السجاير ولا التلاجة حدث ولا حرج ايه اللي حط المناديل فيها الله اعلم. وبعدين فين ريموت التليفزيون يالا هو جت علي ادي.  بتبقي راجعه البيت وهاين عليها ترجع تاني لاهلها وتعمل عيانة.سيبك ياللي مش من العيا وخلينا في الاحتواء كل واحدة تقولك انا عايزة واحد يحتاويني ياختتتتتتتتتتتي علي الاحتواء هو بالمناسبة يعني ايه احتواء.الله يخرب بيت السينما والاعلام المضلل اللي بيجبلك البطلة المتجوزة عندها مشكلة تروح لجوزها وتقوله حبيبي انا عندي مشكلة يقوم واخدها في حضنه ويقعد يدادي فيها ماهو ده اللي جايبلنا الكافية تعالوا بقي للواقع الست مديرها مديها بالجزمة وراجعة البيت اللي بيبعد عن الشغل حوالي ٢ كم في ساعة ونص عشان الزحمة وحرانة ومعفرة زوج لطىف يسآلني طب مش بتتمشي ليه عشان توفر الساعة ونص ارد عليه واقوله عشان يابيه خايفة من التحرش او السرقة بالاكراه والموتسيكلات الطايشة اللي بتمش فوق الرصيف ده لو افترضنا ان في رصيف وهي ماشيه فوقه لا سمح الله المهم بتدخل البيت واول ما بتشوف جوزها بتلمع الدموع في عينيهاوبتجري عليه عشان تترمي في حضنه وتحكيله بتلاقيه قاعد قصاد التليفزيون بالفانلة وطبق الخس علي كرشه و القشر في كل حته ويبصلها ويقولها انا جعان فين الاكل؟!!!!!  تبصله وتقوله انا عايزة اقولك علي حاجة حصلتلي في الشغل يرد عليها بلامبالاة ويقولها ايه خير هيقللوا المرتبات.  ترد عليه لآ بس اصل يقاطعها ويقول يا شيخة وقعتي قلبي في رجليا يالا روحي بقي حضري الغدا لغاية مااكمل فرجة علي المسلسل.  الله طب انا اتكلم مع مين دلوقتي يسمعني ويفهمني ويحتاويني.  طب اللي مش متجوزة ممكن يكون لها صديق تحكي له وتاخد رآيه لكن اللي متجوزة لو عملت كده بيتبصلها بصة وفين النطع اللي انت متجوزاه.  طب اللي مش بتصرف مرتبها علي نفسها وممكن تستلف من اهلها لكن اللي بتصرف علي احسن الظروف جزء من مرتبها علي البيت ولو المرتب خلص ممنوع تستلف من اهلها ويالهوييييييي لو طلبت سلف من جوزها بيتحقق معاها ولا كأنها قاعدة عند نيابة الاموال العامة.لوعندها عربية يبقي لازم تودي وتجيب وتعمل مشاوير البيه كلها ولو معندهاش تبقي ليلة سودا لو طلبت من جوزها يوصلها.  اما اللي مش الف حد بيوصلها.  طب انا اعرف واحده جوزها كان بيديها عربيته كتر خيره علشان بهدلة التاكسيات ولما مرة مقدرتش تسوق لاحد الاسباب قالها انزلي خدي تاكسي لآ وايه اخد العربية ونزل عشان يوصل صاحبه السفارة وبعدين البنك ورجعه علي مجمع التحرير وبعدين رجعوا السفارة تاني وبعدين راحوا هليوبوليس يجيبوا ورق من هناك وبعدين علي التحرير وبعدين وسط البلد عشان يتغدوا واخيرا وصلوا رمسيس عشان يركب قطر اسكندرية وبعدين حس انه معملش الواجب مع صاحبه فخد اجازة وراح وراه بالعربية عشان يوصلوا بقيت مشاويره في اسكندريه وساب مراته وهي حامل علي اخيرها بالذمة بعد الحكايات دي ياتري انهي اميز ظل الراجل ولا ظل الحيطة