ست الستات

عايز تضحك هأقولك علي احلي شو انا لسه مكتشفاه انهاردة الصبح برنامج لطيف قوي علي قناة الدلتا اسمه"ست الستات " المذيعة يا عيني مستضيفة خبيرة تجميل وموديل ولمدة ساعة الخبيرة قاعدة تحفر في وش الموديل علشان تعدل خلقتها وفي نفس الوقت بيستقبلوا مكالمات المشاهدات.اما عن مشاكل المشاهدات فحدث ولا حرج   المشاهدة ١:الو سباح الخيييير المذيعة : سباح النوووور مين معايا المشاهدة ١: رشا من المحلة المذيعة : اهلا يا رشا ياتري عندك سؤال للخبيرة؟ رشا: ايون اصل انا عندي مشكلة امدة كوي كوي الخبيرة : خير يا رشا رشا : اصل انا بصراحة عيوني واسعة كوي كوي ومش عارفة اعمل ايه؟ الخبيرة : نععععم عينيكي واسعة !! (وفي دماغها واسعة لغايت فين يعني ايه الخيبة دي) المذيعة : طب هو حد يطول يا رشا دي حاجة كويسة  رشا : لآ بس دي حاجة مضايقاني كوي (يكونش رشا غلطت في البرنامج وقصدها تكلم برنامج الشيخ سيد لآن عينيها واسعة ومدورة ماعلينا )  الخبيرة : اقولك يا رشا حطي كحل جوه عينيكي وهتضيآ ان شاء الله رشا : ايوه بس المذيعة (تقاطعها): الو الوووو يظهر الخط انقطع ع العموم حلك في الكحل يا رشا حطيه جوه عينيكي وووووومع الاتصال التاني المشاهدة ٢: الو ايوه يا ست المذيعة انا حسنات من شبرا النملة  المذيعة : اهلا يا حسنات ايه مشكلتك حسنات : انا عيندي بوقع سمرة تحت عنايا الخبيرة : قصدك هالات سوداء حسنات : هلالات ايه بجولك بوقع سمرة الخبيرة :طيب يا حسنات اعملي ماسك نشا تحت عينيكي مرة كل اسبوع حسنات : ماسق ايييه دييه طب يا ست المذيعة متشكرين المشاهدة ٣ : الو صباح الخير انا رانيا من طنطا المذيعة : اهلا يا رانيا اتفضلي رانيا : انا مش هاطول عليكم ايه احدث قصات الشعر السنة دي الخبيرة : اكيد طبعا الدجرادية هوه ملك كل القصات المشاهدة ٤:الووو سباح الخير  المذيعة : صباح النور مين معايا  المشاهده ٤: انا نوال ممكن اكلم الخبيرة المذيعة : اتفضلي نوال : لو سمحتي انا عندي بوقع سمرة في وشي  الخبيرة : تحت عنيكي نوال : لآ في وشي الخبيرة :طيب يا نوال اعملي ماسك نشا علي وشك مرة كل اسبوع المشاهدة ٥ : الو الو الو يوه مش سامعه حاجة (طبعا مش هتسمع حاجة لآن احنا قاعدين سمعين كل المحادثات اللي بتتعمل جنبها) المذيعة : من فضلك وطي التليفزيون المشاهدة ٥ : الو الو انا بنتي شعرها مش بيطول سامعني مش بيطول مش بيطول هاه شعرها سمعني (واغلقت الخط) المذيعة(قررت تاخد دور الخبيرة ماهو محدش احسن من حد خصوصا ان الخبيرة لسه بتحفر في وش الضحية اقصد الموديل اللي تحت ايديها) :اكيد مش بتاكل فيتامينات ايوه اهم حاجة هي الحاجات الي بنحتاج ناخد منها الفيتامينات انتي خلي بنتك تركز علي الحاجات دي. مش كده ولا ايه يا فندم الخبيرة( تنظر بامتعاض ولسان حالها بيقول ايوه ياختي افتي افتي ماتيجي تقعدي مطرحي احسن حاجة تقرف): اه طبعا اكيد الخبيرة : ده بقي شكل المودىل بعد ما حطت مكياج الصباح  ولفت الكرسي اللي قاعدة عليه الموديل علشان توري المفاجآة للجمهور ساد صمت رهيب علي الاستوديو وذابت الابتسامات ورفع المصور الكاميرا سريعا عن الموديل ووجهها للمذيعة التي بدورها قالت المذيعة : في نهاية الحلقة نحب نشكر الخبيرة فتاية الفتي وانتظرونا غدا في نفس الميعاد في برنامج ست الستات  وخلصت الحلقة وانا مش قادرة امسك نفسي من الضحك وخصوصا ان نزل التتر مكتوب عليه مع تحيات اسرة برنامج "بيت العيلة" !!!!!!!!!!!!!!!!  

دى لعنة الصبغة ولا لعنة الصورة

كل ست مش عارفة ليه بيجي عليها يوم وتصبغ شعرها وعلشان انا ضد الصبغة ،بعد كام سنة كده من التخرج قررت اصبغ وجربت كتير من الالوان ابتديت باللون الاحمر اللي عند كوافير النادي والنحاسي والهاي لايت واللوو لايت لغاية ما انتهيت بالبني مع الخصل السوبر بلوند عند محمد الصغير ايوه ماهو انا لازم اجرب ومش عايزة اقولكم ان اللون ده غير حياتي لفترة كام شهر كده وبعدين يجي ١٤سنة كده. نبتدي الاول بالكام شهر فاكرين انغام في اغنية "عمري معاك "ايوه هوة اللون ده.كان موضة قوي ايامها.وطبعا مدام غيرت لون شعري يبقي لازم اغير كمان طريقة لبسي يالا اهوه الواحد يشوفله يومين ويعيش زي التانييين وطبعا زي اي  روشة كان لازم انقص وزني شوية والبس البانتكور والخلخال ....الخ.كنت مستمتعة جدا بمعاملة الناس لي قال يعني فنانة اعلانات محدش اكتشفها لسه اتاري برضه لون الشعر بيفرق كتير واخر حاجة كان الناس بيصدقوها اني مهندسة.مهندسة ايه بقي هوه فيه مهندسة بتلبس بانتكور وخلخال وصاندل بكعب ٩ سم وصبغة شعرها اكيد لأ وطبعا كان لازم الواحد يمشي بشهادة التخرج لأن البطاقة كان مكتوب فيها طالبة بمدرسة لاروز دي ليزيو طبعا فيه ناس هتقولي ازاي يعني ما احنا كنا طلبة وكلنا مكتوب في البطاقات بتاعتنا طلبة وخلاص. لآ ماهو بجملة الهيافة انا طلبت من بابا انه يكون مكتوب في بطاقتي اسم المدرسة علشان اكون مميزة عن الناس وبالاخص واحدة كانت معايا في المدرسة كانت غاوية تفشر عليا وكل فشرها ده في الاخر كان بيجي علي دماغ بابايا.المهم الراجل يا عيني ماتآخرش اتصل بواحد لواء معرفة وطلب منه يبعتلي الموظف بتاع السجل المدني في البيت علشان يكتبللي اللي اناعايزاه في البطاقة وجه الراجل وخلصلي البطاقة واخد ١٠٠ جنية وكانوا ايامها فلوس وكتير كمان بس هنعمل ايه بقي كله عشان خاطر عيوني وعشان اغيظ صاحبتي وحبيبتي الفشارة. وفرجت المدرسة كلها البطاقة بتاعتي ومفيش بعد كام يوم كده جت صديقتي الفشارة تحكي حكاية تشبه حكايتي بالضبط مع بعض الختلافات لزوم حقوق النشر والذي منه بس الحقيقة احنا لغاية دلوقتي لسه ماشفناش البطاقة بتاعتها اللي طبعا اتدفع فيها اكتر والمكتوب فيها اسم المدرسة زيييييي. المهم نرجع لموضوعنا الاساسي اضطريت اغير البطاقة للرقم القومي عشان اثبت اني مهندسة وطبعا كلنا عارفين صورة الرقم القومي عاملة ازاي بس انا خيبتي كانت اشد اول ما قعدت قدام الموظف بص لي بزهق وسألني "لون شعرك الاساسي ايه ؟"،رديت وانا مش واخدة خوانة "اسود". ودي بقي الغلطة اللي هتستمر معايا ١٤سنة.السبعة الاولنين لآن الموظف غمق في الصورة لغاية لما شعري بقي لونه اسود عشان يبقي طبيعي بص المشكلة الاكبر ان ملامحي كلها بقت سوده يعني باختصار بقيت من زنوج مصر.يعني هو بفتاكته خاف انصب علي الناس بلون شعري فغير لي لون شعري وبشرتي بالمرة.وفضلت كام سنة الناس مش عايزة تصدق ان دي بطاقتي وفضلت سنين ماشية برخصة السواقة كآثبات شخصية رغم ان شكلي فيها مدمنة مخدرات ومكسلة اروح اغير البطاقة واتجوزت الحمدلله و هاغير البطاقة وهاغير الصورة وكنت خايفة لأني كنت صبغة شعري لزوم الفرح وبتاع بس مكانش اللون مختلف كتير عن الطبيعي ومهمان كان اكيد الصورة الجديدة هتكون اقرب لي من القديمة وبعد وقفة في السجل المدني ٨ ساعات موظف التصوير مشي وكانت النتيجة اني هاعيش كمان ٧ سنين بالصورة القديمة اللي اول ما اخويا شافها قال لي هوه لعنة الصورة دي مش هاتزول عنك.

المحطة بتولع

طيب بما ان القطر لسه ما وصلش اسكندرية ده بسبب ان ميعاد الوصول لسه ماجاش مش بسبب حاجة تانية مانا عارفة القراء بقي مايصدقوا خيالهم يسطح ويعقدوا يقولوا ايوه قطاع طرق ايوه عطل ايوه فيه حد مات اي كلام لآ ميعاد الوصول لسه ماجججججججاش واضحة. المهم انا بقي جوزي لما بيروح اسكندرية بيبقي صورة طبق الاصل من اللي رايح يروق دملغه عند مراته التانية واحدة فتكة بقي هتقولي طب وانت اش عارفك يا عبيطة ما يمكن هي دي الحقيقة هاقولها لأ ياحبيبتي ماتخافيش اختك واعية تسيبوا يسافر من هنا ومفيش بعد كام ساعة بتكون طبة عليه زي القضي المستعجل مش موضوعنا. هو بقي لما بيروح هناك بينسي انه متجوز صياعة بقي في الشوارع ليل ونهار وياكل سمك براحته مانا من جمعيه كارهي الاسماك لكن جنبري اوكيه هاتك يازيارات هنا وهناك ومحلاها عيشة الحرية. المهم جهزت التذكرة وآن اوان اني اطوب عليه خصوصا انه هناك مع حماي وحماتي واخوه وسلفتي اللي هي صاحبتي اصلاً يعني لمة لطيفة ومعرفش ازاي رغم كل اللي حكيته في المقال اللي فات راحت عليا نومة نومة !!!!!!!!! نهار اسود نومة صحيت جري ولميت الشنطة وعلي المحطة باقصي سرعة وهاتك يا سبرنت لغاية ما وصلت قبل الميعاد بربع ساعة واذ بي افوق علي حريقة في المحطة ومطافي وناس ماسكة الموبايلات بتصور الحريقة وواقفين جنب النار ولا فريد شوقي في زمانه علشان يتصوروا مع الحريقة ورجالة المطافي بتضرب كف بكف و عايزيين الناس توسع عشان يشوفوا شغلهم وهيصة وانا طبعا واقفة مذهولة فقت من الذهول عشان اشوف قطرى لقيته بيخلع من الرصيف جريت وراه وحصلته وحاولت اعمل زي كل الناس وانط بس افتكرت صلاح منصور لما فقد رجله في نطة زي دي وتراجعت ووقفت حيرانة كلمت جوزي حكيت له اتخض قوي وانفعل وقال لي روحي علي البيت طبعا فرصة وانا خارجة من المحطة سمعت في الاذاعة الداخلية بيقولوا بتوع اسكندرية ميمشوش القطر راجع تاني علي رصيف تاني. اتجهت للرصيف التاني وركبت القطر وبعد ساعة كده فقت من الصدمة واكتشفت الطامة الكبرااااااااااااا ايه ده انا جوزي مطمنش عليا لغاية دلوقتي وميعرفش انا فين لآ هوه يوم اسود من آولة لا عن اذنكم بقي عشان الكلام ده مش نافع. 

انا والمواصلات

انا والمواصلات بقه اييييييييه حدث ولا حرج كل علاقتي بيها الافلام يعني عمري ما ركبتها غير مرات معدودات قوي وللاسف ثقافة الافلام دي اللي يعتمد عليها يروح ورا الشمس يعني ببساطة انطباعتي عن التاكسيات تكونت بفضل جميع الممثلين اللي اتخانقوا عل البنديرة ابتداء من سهير البابلي في فيلم استقالة عالمة ذرة انتهاءاً بمروة عبد المنعم في فيلم عمر وسلمي ١او٢او ٣ مش مهم دة غير البطلة اللي عندها عقدة علشانوسواق تاكسي خدها في حتة ضلمة وانتوا بقي عارفين طول الفيلم بتتعالج اما عن الاوتوبيسات فاجاراك الله نيللي كلنت هتنسي ابنها فيه،احمد حلمي اتحرشوا بيه،انتصار الراجل جه قعد مخصوص جنبها رغم ان الاوتوبيس كان فاضي تماماً ومع ذلك التحرش يحكم ولو مفيش تحرش يبقي نشل اهوه اي مصيبة والسلام ده غير بقي عقدتي من القطارات اللي بيطلع عليها قطاع الطرق يسرقوا الناس هتجنن لدرجة وانا قاعده دلوقتي في القطار وعماله اكتب المقال ده خايفة للقطاع يطلعوا علينا وياخدوا الاي باد الجديد بتاعي ولو مفيش قطاع طريق يبقي يا القطر عطل يأما اكل رجل حد اما بالنسبة للميكروباص احب اطمنكوا انا بطلت اتفرج علي افلام قبل توحش ظاهرة الميكروباص ٠ولهذة الاسباب كان اهلي ربنا يخليهم ليا بيوصلوني اي مكان ولو مش فاضيين وانا رايحة الواحده صاحبتي ساكنة بعيد شوية فكانت بتيجي تاخدني وترجعني اه وتاخد ايصال اخلاء الطرف من اهلي مهم في اضيق الحدود اضطريت مرة اخد تاكسي من الكلية للزمالك لبيتنا في الدقي وكان الاتي اولا مش عارفة هوه التاكسي ده بياخد كام المهم سألت وعرفت وركبت وبعدين بعد كام كيلو كده لقيت الراجل الطيف سواق التاكسي بيقولي فين في الدقي فرديت بتحفز في مصدق فضحك زي الحشاش وقاللي هةهةهة مصدق ولا مصدقش طبعا انا قلبي وقع في رجليا وقلت اهه دلوقتي يكرن بينا في حتة مقطوعة في المهندسين ماحنا كنا نزلنا من كوبري مايو وتبقي ليلة سودا ولقيت نفسي بقولوا اركن علي جنب انا هنزل هنا ركن ونزلني وخد الاجرة ومشي وهوه مذهول وانا كملت المشوار مشي ايوه مشي وماله وامال اتعالج بقيت الفيلم٠الاوتوبيس بقي واحدة زملتي في الكلية في غفلة من اهلي ركبتهولي وكان يوم اسود عليها وعلي الركاب مبدئيا كان حظي حلو انه كان فاضي واحنا قاعدين بس ده ميمنعش التآفف اللي الناس خدوه من ساعة ما دفعت العشر القروش اللي اخر مرة استعملتها كان وانا في اولي ابتدائي٠طبعا اجبرتها اننا نروح بتاكسي وبعده توترت علاقتنا وقطعتها خالص يالا زنت علي خرابها٠الكبيرة بقي القطار انا بقي عرفت القطر لما اتجوزت وعلشان القطر ليه سوابق كتير في قطع رجلين وادين الممثلين فانا لازم اكون هناك قبل الميعاد بنص ساعة علي الاقل علشان الحق اركب براحتي من غير ما اجري وراه واتزحلق تحتيه وانت عارفين الباقي بقي ولازم اقف في نص الرصيف بالضبط احسن لوقفت قريب من الطرف ممكن واحد اهتم معدي يزقني وانا مش ناقصة واول ما يجي استني شوية لغاية ما يقف وعامل المحطة يحلف الفيمين انه مش هيتحرك وانا بركب اقوم نطه فيه برضه وكانه بيتحرك وهيفوتني مفيش فايدة ولا كل شوية اسال هوه ده قطر اسكندريه هوة ده قطر اسكندرية احسن اروح اسيوط زي فاتن حمامة محدش ضامن حاجة وياسلام بقي لو انا بره مصر وهاركب القطر وجوزي معايا بيتعب قوي مش القطر جوزي لآ بيتعب ايه بيتتعذذذذذذذب. طبعا هوه رايح انه قبل الميعاد بنص ساعة ومطمن وفاكر نفسه في رحلة بغض النظر ان احنا فعلا في رحلة البيه بقي مطلع الكاميرا وهاتك ياتصوير طبيعي ما دي بلد مش هنجيها تاني بس انا عندي مخاوف متآصلة فبناءاً عليه كل الصور بتاعي في محطات القطر والمطارات لازم اطلع فيها بالوش العكر لغاية ما اقعد في مكاني وطبعا علشان شنطة عبد الحليم اتلخبطت مع شنطة فاتن حمامة في فيلم حلو وكداب فطبعا انا تقريبا نص الرحلة ببقي بشقر علي الشنطة او احمد ياعيني واقف جنبها وطبعا بيدخن مش فارقة بقي سجاير ولا مني النتيجة واحدة. ماتعرفوش بقي لما رحت محطة مصر اللي في رمسيس متاخرة وكان فيه حريقة يالههههههههوي بعد كل العقد دي المرة الجاية بقي احكي لكم.