الكافييييين

انا مدمنة كافيين ازاي معرفش اصل لغاية سن الستاشر كنت ممنوعة من شرب اي نوع من المكيفات سواء شاي، قهوة او نسكافية...........الخ. 

هوه العصير الفريش وبس وده كله عشان مامتي منعاني انا واخواتي منشرب الحاجات دي عشان يكون عندنا نضارة. كبرت ودخلت الجامعة وهناك لقيتهم بيعملوا في الكانتين نسكافية ب ٧٥ قرش وكل الزملاء بيروحوا يشربوه وعشان انا عمري ما شفت البتاع ده في البيت عندنا فرحت من باب الفضول اشتري واحد واشربه وقد كان. ايه ده!!!!!!! ده سخن!!!!!! اوي !!!!!! طب وبعدين انا اصلا بشرب كل حاجة ساقعة ومش متعوده علي السخن والمحاضرة هتبتدي طب انا استني بقي لما يبرد ولا اروح المحاضرة؟ ومن منطلق احساسي بالمسئولية سبت المحاضرة وقعدت جنب النسكافية استناه لما يبرد وفجأة عدي من فوق الترابيزة قط شارد دلق عليا النسكافية بس الحمدلله كان برد طب وبعدين راحت المحاضرة هدر الله يعوض عليا. تاني يوم من بدري وقفت اشتري نسكافية بس المرة دي كنت واعية وطلبته بارد الجرسون بص لي بصة الفرفورة ودي بصة بيعرفها الفرافير بس للآسف وقال لي مش فاهم، رديت ببساطة ايوة يعني بدل ما تعملوا بميه سخنة اعمله بمية باردة. وبعد الحاح واستعطاف والرشوة التمام ( ربع جنية) وافق يعمل لي النسكافية البارد علي مسئوليتي.  اخيرا شربت النسكافيه وانبسطت قوي قوي وبان عليا اثره لما جيه الليل ومعرفتش انام طبعا مانا عمري ما شربت كافييين في حياتي.  

ايام وليال وانا كل يوم الصبح اخد مج النسكافية البارد ولا القهوة التركي اللي كان ليها اصول اروح الصبح بدري اخلي الجرسون يعملها ويحطها في الثلاجة وبعدين اجي انا علي السعة اتناشر اخدها. استمر الحال ده ٣ سنين الي ان كانت الطامة الكبري واتغير الجرسون وكان ده السبب اني ابتديت اشرب النسكافيه والقهوة سخنين خصوصا ان الربع جنية الرشوة مكانش يملي عينه وانا مكانتش الميزانية بتاعتي تسمح برشوة اكتر من كده. فاضطريت اشرب النسكافية سخن.  

طبعا من المقدمة دي سهل تستشفوا اني معرفش يعني ايه كابتشينو او موكا او اكسبريسو او غيره وكان السبب ان الحاجات دي بتتشرب في كافيهات بمنيمم تشارج وانا يادوب مصرفي كان بيكفي قعدة النادي وكانتين الكلية. مرت السنين اشتغلت وبقي عندي مرتب وعرفت الكابتشينو بس معنديش الفضول اجرب الموكا واللاتيه والحاجات دي وجاء يوم وعرض عليا احد الزملاء ان يحضر لي اكسبريسو. فكرت شوية وقلت وماله راح سآلني دبل ولا سينجل وعشان انا متعودة علي الحجم الكبير طلبت دبل بثقة. دخل عليا الزميل ومعاه كوستبان شبه كوستبان الخياطة. بصيت له حتة بصه وانا في سري بقول ايه اللي انت جايبة دة انا طلبت دبل يعني مج كبير وبعدين ايه الوفر ده مآنا هادفع حسابي لنفسي اوف المهم اخدت الكوستبان قصدي الفنجان وبصيت فيه وفوجئت انه كمان من غير لبن. وبصيت لزميلي بصة حقد وقرف هوه مش عارف للنهاردة معناها وانا في سري باقول وكمان من غير لبن. من آمتي انا بآشرب الكافيين من غير لبن اومال عشرة ايه وبتاع ايه    يلا معلش اشربه وخلاص من سكات ومع اول شفطة لآآآآآآآ وكمان من غير سكر ده ايه المرار ده وقفشت ومشيت من غير سلام ولا كلام  ومحدش يعرف انا قفشت ليه.   ومرت الايام وعرفت ان هوه الاكسبريسو اصوله كده وان دبل دي يعني جرعة كافييين اعلي يلا معلش الجهل وحش برضو.